ಹೈದರಾಬಾದ್: ತೆಲುಗು ಸೂಪರ್ಸ್ಟಾರ್ ಚಿರಂಜೀವಿ ಅವರು 46 ವರ್ಷಗಳಲ್ಲಿ 156 ಸಿನಿಮಾ ಮತ್ತು 536 ಹಾಡುಗಳಲ್ಲಿ ಕಾಣಿಸಿಕೊಂಡಿದ್ದಾರೆ, 24 ಸಾವಿರ ಡ್ಯಾನ್ಸ್ ಮೂಮೆನ್ಟ್ಸ್ ಮಾಡಿದ್ದಾರೆ ಎಂದು ಗಿನ್ನಿಸ್ ರೆಕಾರ್ಡ್ ದಾಖಲೆ ಆಗಿದೆ. ‘Most Prolific Film Star in Indian Cinema’ ಎಂದು ಪ್ರಶಸ್ತಿ ನೀಡಲಾಗಿದೆ. ಆಮಿರ್ ಖಾನ್ ಅವರು ಈ ಸಮಾರಂಭದಲ್ಲಿ ಭಾಗಿ ಆಗಿದ್ದರು. ಸೆಪ್ಟೆಂಬರ್ 22 ಕ್ಕೆ ಈ ಪ್ರಶಸ್ತಿ ಪ್ರದಾನ ಮಾಡಲಾಗಿದೆ.
ಚಿರಂಜೀವಿ ಬಗ್ಗೆ ಮಾತನಾಡಿದ ಆಮಿರ್ ಖಾನ್ ಅವರು “ನೀವು ಚಿರಂಜೀವಿ ಅವರ ಯಾವುದೇ ಹಾಡು ನೋಡಿದರೂ ಕೂಡ ಅಲ್ಲಿ ಅವರು ಹೃದಯತುಂಬಿ ಕುಣಿದಿರುತ್ತಾರೆ, ನಟಿಸಿರುತ್ತಾರೆ. ಅವರು ಪ್ರತಿ ಹೆಜ್ಜೆಯನ್ನು ಎಂಜಾಯ್ ಮಾಡುತ್ತಾರೆ. ಅದನ್ನು ನೋಡಿ ನಾವು ನಮ್ಮ ಕಣ್ಣನ್ನು ಬೇರೆ ಕಡೆಗೆ ವರ್ಗಾಯಿಸಲು ಆಗೋದಿಲ್ಲ. ನಿಮ್ಮ ಜರ್ನಿಯಲ್ಲಿ ಸಾಕಷ್ಟು ಮೈಲಿಗಲ್ಲುಗಳಿವೆ. ಇನ್ನು ಹೆಚ್ಚಿನ ಮೈಲಿಗಲ್ಲು ಸೃಷ್ಟಿ ಆಗಬೇಕು ಎಂದು ಬಯಸುವೆ. ನಿಮ್ಮಿಂದ ನಾವು ಯಾವಾಗಲೂ ಪ್ರೇರೇಪಿತಗೊಂಡಿದ್ದೇವೆ ಎಂದು ಹೇಳಿದ್ದರು.
ಚಿರಂಜೀವಿ ಮಗಳು ಸುಷ್ಮಿತಾ ಕೊನಿಡೆಲ, ವರುಣ್ ತೇಜ, ಸಾಯಿ ಧರ್ಮ ತೇಜ, ಪಂಜ ವೈಷ್ಣವ್ ತೇಜ, ನಿಹಾರಿಕಾ ಕೊನಿಡೆಲ ಸೇರಿದಂತೆ ಇಡೀ ಕುಟುಂಬ ಚಿರಂಜೀವಿ ಅವರನ್ನು ಅಭಿನಂದಿಸಿದೆ. ಅಷ್ಟೇ ಅಲ್ಲದೆ ಚಿರಂಜೀವಿ ಸೊಸೆ ಉಪಾಸನಾ ಕೊನಿಡೆಲ ಕೂಡ ವಿಶೇಷ ಪೋಸ್ಟ್ ಮೂಲಕ ತಮ್ಮ ಮಾವನಿಗೆ ಶುಭಾಶಯ ತಿಳಿಸಿದ್ದಾರೆ. ಚಿರಂಜೀವಿ ಅವರು ‘ವಿಶ್ವಂಬರ’ ಸಿನಿಮಾದಲ್ಲಿ ನಟಿಸಿದ್ದು, ಈ ಚಿತ್ರ ರಿಲೀಸ್ ಆಗಬೇಕಿದೆ. ಮಲ್ಲಡಿ ವಸಿಷ್ಠ ಅವರು ಈ ಸಿನಿಮಾವನ್ನು ನಿರ್ದೇಶನ ಮಾಡಿದ್ದರು.
ಚಿರಂಜೀವಿ ಅವರಿಗೆ 69 ವರ್ಷ ವಯಸ್ಸು. ‘ಇಂಡಿಯನ್ ಸೂಪರ್ ಲೀಗ್’, ‘ಕೇರಳ ಬ್ಲಾಸ್ಟರ್ಸ್ ಎಫ್ಸಿ’ ತಂಡದ ಮಾಲೀಕರು ಕೂಡ ಹೌದು. ಸಿನಿಮಾ, ರಾಜಕೀಯ, ಸಾಮಾಜಿಕ ಸೇವೆಯಲ್ಲಿಯೂ ಅವರು ಕೊಡುಗೆ ನೀಡಿದ್ದಾರೆ. ಚಿರಂಜೀವಿ ಅವರಿಗೆ ‘ಪದ್ಮಭೂಷಣ’, ‘ಪದ್ಮವಿಭೂಷಣ’, 9 ಫಿಲ್ಮ್ಫೇರ್ ಪ್ರಶಸ್ತಿಗಳು ಸಿಕ್ಕಿವೆ. ಭಾರತೀಯ ಚಿತ್ರರಂಗದ ಮುಖವನ್ನು ಬದಲಾಯಿಸಿದ ವ್ಯಕ್ತಿ ಎಂದು ಕೂಡ ಇವರಿಗೆ ಪ್ರಶಸ್ತಿ ನೀಡಲಾಗಿದೆ.
ಚಿರಂಜೀವಿ ಅವರನ್ನು ನಿರ್ದೇಶಕ ಎಸ್ ಎಸ್ ರಾಜಮೌಳಿ ಅವರು ಅಭಿನಂದಿಸಿದ್ದಾರೆ. “ಗಿನ್ನಿಸ್ ರೆಕಾರ್ಡ್ ದಾಖಲೆಗೆ ಸೇರಿದ್ದಕ್ಕೆ ಚಿರಂಜೀವಿ ಅವರಿಗೆ ಅಭಿನಂದನೆಗಳು” ಎಂದು ಸೋಶಿಯಲ್ ಮೀಡಿಯಾ ಪೋಸ್ಟ್ ಹಂಚಿಕೊಂಡಿದ್ದಾರೆ.
