ಶ್ವೇತಭವನದ ಮೇಲೆ ದಾಳಿ; ಭಾರತೀಯ ಮೂಲದ ವ್ಯಕ್ತಿಗೆ ಜೈಲು.

ವಾಷಿಂಗ್ಟನ್: ಶ್ವೇತಭವನದ ಮೇಲೆ ದಾಳಿ ಮಾಡಲು ಯತ್ನಿಸಿದ ಆರೋಪದ ಮೇಲೆ ನಿನ್ನೆ ಭಾರತೀಯ ಮೂಲದ ಸಾಯಿ ವರ್ಷಿತ್ ಕಂದುಲಾ ಎಂಬಾತನಿಗೆ ಅಮೆರಿಕದ ನ್ಯಾಯಾಲಯ ಎಂಟು ವರ್ಷಗಳ ಜೈಲು ಶಿಕ್ಷೆ ವಿಧಿಸಿದೆ. 2023 ರ ಮೇ 22 ರಂದು ಸಾಯಿ ವರ್ಷಿತ್ ಬಾಡಿಗೆ ಟ್ರಕ್ ಬಳಸಿ ಶ್ವೇತಭವನದ ಮೇಲೆ ದಾಳಿ ಮಾಡಲು ಯತ್ನಿಸಿದ್ದ. ಚುನಾಯಿತ ಅಮೇರಿಕನ್ ಸರ್ಕಾರವನ್ನು ಉರುಳಿಸಿ, ನಾಜಿ ಸಿದ್ಧಾಂತದ ಸರ್ವಾಧಿಕಾರವನ್ನು ಸ್ಥಾಪಿಸುವುದು ಈ ದಾಳಿಯ ಗುರಿಯಾಗಿದೆ. ಅಲ್ಲದೇ ಆತ ಸರ್ಕಾರಿ ಆಸ್ತಿಯನ್ನು ಉದ್ದೇಶಪೂರ್ವಕವಾಗಿ ಹಾನಿ ಮಾಡಿದ್ದ ಎಂದು ಅವನ ಮೇಲೆ ಆರೋಪಿಸಲಾಗಿತ್ತು. ಅವನು 2024ರ ಮೇ 13ರಂದು ತಪ್ಪೊಪ್ಪಿಕೊಂಡಿದ್ದಾನೆ. ನ್ಯಾಯಾಲಯದ ದಾಖಲೆಗಳ ಪ್ರಕಾರ, 2023ರ ಮೇ 22 ರಂದು ಮಿಸೌರಿಯ ಸೇಂಟ್ ಲೂಯಿಸ್‍ನಿಂದ ವಾಷಿಂಗ್ಟನ್ ಡಿ.ಸಿಗೆ ವಾಣಿಜ್ಯ ವಿಮಾನದಲ್ಲಿ ವರ್ಷಿತ್ ಬಂದಿದ್ದ. ಅಲ್ಲಿ ಟ್ರಕ್ ಬಾಡಿಗೆಗೆ ಪಡೆದಿದ್ದ. ಅಲ್ಲಿಂದ ಶ್ವೇತಭವನದ ಬಳಿ ಹೋಗಿ ತಡೆಗೋಡೆಗೆ ಡಿಕ್ಕಿ ಹೊಡೆಸಿ ದಂಗೆ ನಡೆಸಿದ್ದ. ಕೂಡಲೇ ಅವನನ್ನು ಬಂಧಿಸಲಾಗಿದೆ.